Աբու Դաբիում Իլհամ Ալիևի և Նիկոլ Փաշինյանի միջև բանակցություններն ավարտվել են։ Ինչպես տեղից հաղորդում են ադրբեջանական լրատվամիջոցները, դրանք տևել են մոտ հինգ ժամ, ընդհատվել մեկ անգամ։
Այդ ընթացքում պատվիրակությունները հանդիպել են նախ լայն կազմով, ապա՝ Փաշինյանն ու Ալիևը բանակցությունները շարունակել են երկկողմ, հետո կրկին նրանց են միացել պատվիրակության անդամները։ Ավարտին որևէ հայտարարություն չի հնչել։
Ադրբեջանական APA գործակալության թղթակիցը տեղից հաղորդում է, թե «լուրջ և բովանդակալից քննարկումներ են տեղի ունեցել Հայաստանի և Ադրբեջանի միջև խաղաղության օրակարգի հիմնական ասպեկտների, այդ թվում՝ սահմանազատման, Զանգեզուրի միջանցքի բացման և զարգացման, խաղաղության համաձայնագրի նախաստորագրման և այլ հարցերի շուրջ»։
Հայկական կողմը որևէ հաղորդագրություն դեռ չի տարածել։